黃夏蕙欲將全數捐助演藝界

【本報訊】黃夏蕙早前獲香港演藝人協會發放9千元抗疫基金,受到梁思浩質疑,昨日夏蕙姨出席活動揚言會捐出億元助有需要的演藝界工作人員。
夏蕙姨與經理人Simon昨日到銅鑼灣為《網上平台「埋嚟睇」節目《關公有請》錄影,分享二人相識經過及近十年的合作點滴。問到有什麼工作她是一定不會接?夏蕙姨表示從來不會推工作,要她扮豬扮狗都可以,就算過年要瞓棺材都照做。
夏蕙姨早前在社交平台上載領取香港演藝人協會9千元抗疫基金支票的相片,夏蕙姨指政府行行都有派錢,連揼骨的都有,但藝人就沒錢派:「 現在疫情好多藝人受影響 ,有啲藝人手停口停 ,我都停咗半年,冇出嚟係因為車錢都冇,我未算慘 ,最慘係啲攝影師、化妝,佢哋冇工開食穀種。」她又稱其實她想同演協主席古天樂(古仔)搵政府幫手,「古仔突然籌到一筆錢,我都唔知佢哋點派 ,後來發現有啲兩年內冇工作嘅會員冇份派 ,但唔關我事,我乜都唔知。」
對於梁思浩指她是擁有幾層物業的有錢人,竟去領取抗疫基金,夏蕙姨說:「佢話我有錢都好過話我窮過做乞丐,佢話我貪心,但我唔係為自己,我係有錢,但我冇去攞,先夫胡百全留咗個基金,係億億聲,但我冇時間去搞,我有6個仔女,連埋自己,基金分7份,我將自己嗰份捐出嚟,(唔留啲畀自己?)我唔使點用錢,呢兩日就會去搞,一個月內就OK,幫真正有需要嘅人,藝人就唔需要,會捐過億,幫得一啲得
一啲。」